पश्चिमी वायुको आंशिक प्रभाव : तराई र उपत्यकामा हुस्सु, उच्च भेगमा हल्का वर्षा–हिमपातको सम्भावना

काठमाडौं । हाल देशमा पश्चिमी वायुको आंशिक प्रभाव रहेको जल तथा मौसम पूर्वानुमान महाशाखाले जनाएको छ । महाशाखाका अनुसार तराईका धेरै स्थान तथा उपत्यकाहरूमा हुस्सु लागेको छ भने हिमाली तथा उच्च पहाडी भागमा आंशिक बदली देखिएको छ ।

आज दिउँसो तराईका केही स्थानमा मध्याह्नसम्म हुस्सु कायम रहने सम्भावना रहेको छ । देशका उच्च पहाडी तथा हिमाली भागमा साधारणतया बदली रहनेछ भने बाँकी पहाडी क्षेत्रमा आंशिक बदली र तराईमा मुख्यतया मौसम सफा रहने अनुमान गरिएको छ ।

कोशी, बागमती, गण्डकी र कर्णाली प्रदेशका उच्च पहाडी तथा हिमाली भेगका एक–दुई स्थानमा हल्का वर्षा तथा हिमपातको सम्भावना रहेको महाशाखाले जनाएको छ ।

आज राति तराईका केही स्थानमा तुँवालो लाग्ने सम्भावना रहेको छ । कोशी र गण्डकी प्रदेशका उच्च पहाडी तथा हिमाली क्षेत्रमा साधारणतया बदली रहनेछ भने अन्य स्थानको मौसम मुख्यतया सफा रहने जनाइएको छ । ती क्षेत्रमा पनि एक–दुई स्थानमा हल्का वर्षा तथा हिमपात हुन सक्ने पूर्वानुमान गरिएको छ ।

तराईका केही स्थानमा मध्याह्नसम्म हुस्सु रहने र तत्काल वर्षाको सम्भावना नरहेकाले तराई र उपत्यकाहरूमा वायु प्रदूषण कायमै रहने देखिएको महाशाखाले जनाएको छ । प्रतिकूल मौसमका कारण हुन सक्ने प्रभावबाट जोगिन सर्वसाधारण तथा सरोकारवाला निकायलाई आवश्यक सतर्कता अपनाउन आग्रह गरिएको छ ।