काठमाडौं । कर्णाली प्रदेशको सुर्खेतमा आयोजना हुने दशौँ बृहत् राष्ट्रिय खेलकुद प्रतियोगिताका लागि सुदूरपश्चिम प्रदेशबाट कराते खेलमा २१ जना महिला तथा पुरुष खेलाडी छनोट भएका छन् । कञ्चनपुरको महेन्द्रनगरमा सोमबार सम्पन्न प्रदेशस्तरीय छनोट प्रतियोगिताको फाइनल खेलबाट विभिन्न विधा र तौल समूहमा २१ खेलाडी राष्ट्रिय प्रतियोगिताका लागि छनोट भएका हुन् ।
कराते कञ्चनपुरका प्रशिक्षक वीरेन्द्रबहादुर चन्दले छनोट भएका खेलाडीले दशौँ राष्ट्रिय खेलकुद प्रतियोगितामा सुदूरपश्चिम प्रदेशको प्रतिनिधित्व गर्ने जानकारी दिएका छन् । उनका अनुसार एकल काता, समूह काता तथा महिला र पुरुष कुमुते विधाबाट खेलाडी छनोट गरिएको हो ।
एकल कातातर्फ पुरुषमा कञ्चनपुरका नागेश थलाल र महिलातर्फ कञ्चनपुरकै पार्वती पार्की छनोट भएका छन् । त्यसैगरी, पुरुष समूह कातातर्फ कैलालीका प्रवेश मल्ल, मिलन कार्की र हेमबहादुर बोगटी छनोट भएका छन् । महिला समूह कातातर्फ कञ्चनपुरका सुदिका अधिकारी, ज्यासमिनु मार्कण र निशा चौधरीले राष्ट्रिय प्रतियोगितामा स्थान सुरक्षित गरेका छन् ।
कुमुते विधातर्फ महिला खेलाडीमा ४५ किलो तौल समूहबाट कैलालीकी पूजा सुनार, ५० किलोमा कञ्चनपुरकी आयुसा ताम्राकार, ५५ किलोमा कैलालीकी करुणा जाग्री, ६१ किलोमा कैलालीकी गरिमा मल्ल र ६८ किलो तौल समूहबाट कैलालीकै मनिषा बोहरा छनोट भएका छन् ।
त्यसैगरी, पुरुष कुमुतेतर्फ ५० किलो तौल समूहमा कैलालीका छत्र थापा, ५५ किलोमा दार्चुलाका सुरेन्द्र लोहार, ६० किलोमा कैलालीका लक्ष्मण बिसी, ६७ किलोमा कैलालीकै अर्जुन थापा छनोट भएका छन् ।
त्यस्तै, ७५ किलो तौल समूहमा कैलालीका सन्देश पार्की, ८४ किलोमा कैलालीका कमल ओली र ८४ किलोभन्दा माथिको तौल समूहमा कैलालीकै लोकेश पार्की राष्ट्रिय प्रतियोगिताका लागि छनोट भएका छन् ।
यसैबीच, सुदूरपश्चिम प्रदेशबाट छनोट भएका कराते खेलाडीलाई थप उत्साहित बनाउन प्रदेश कराते महासङ्घले विशेष पुरस्कारको घोषणा गरेको छ । महेन्द्रनगरमा आयोजित प्रदेशस्तरीय कराते छनोट प्रतियोगिताको समापन समारोहमा सुदूरपश्चिम प्रदेश कराते महासङ्घका अध्यक्ष त्रिलोक्यनाथ पाण्डेले दशौँ राष्ट्रिय खेलकुद प्रतियोगितामा कराते विधातर्फ स्वर्ण पदक जित्ने प्रत्येक खेलाडीलाई एक लाख रुपैयाँ नगद पुरस्कार प्रदान गर्ने घोषणा गरेका हुन् ।
कराते प्रशिक्षक चन्दका अनुसार अध्यक्ष पाण्डेले स्वर्ण पदक विजेता खेलाडीलाई जनही एक लाख रुपैयाँ दिने प्रतिबद्धता जनाएका छन् । यस घोषणाले राष्ट्रिय प्रतियोगितामा सहभागी हुने खेलाडीको मनोबल बढाउनुका साथै प्रदेशका लागि पदक जित्ने लक्ष्यमा थप प्रेरणा मिल्ने अपेक्षा गरिएको छ ।
प्रशिक्षक चन्दले खेलाडीलाई प्रोत्साहन गर्ने उद्देश्यले गरिएको पुरस्कार घोषणाको स्वागत गर्दै यसले खेलाडीमा थप उत्साह र आत्मविश्वास बढाउने विश्वास व्यक्त गरेका छन् ।
सुदूरपश्चिम प्रदेश खेलकुद परिषद्को आयोजनामा प्रदेशका कञ्चनपुर, कैलाली र डडेल्धुरामा विभिन्न खेल विधाका प्रदेशस्तरीय छनोट प्रतियोगिता सञ्चालन भइरहेका छन् । कञ्चनपुरको महेन्द्रनगरमा आठ खेल विधाको छनोट प्रक्रिया अन्तिम चरणमा पुगेको छ ।
जिल्ला खेलकुद समिति कञ्चनपुरका अध्यक्ष ज्ञानेन्द्रबहादुर सिंहका अनुसार सोमबार कराते, तेक्वान्दो, महिला तथा पुरुष कबड्डी र ह्यान्डबललगायत खेलका छनोट प्रतियोगिता सम्पन्न भएका छन् ।
प्रदेश खेलकुद परिषद्का अनुसार सुदूरपश्चिम प्रदेशमा प्रदेशस्तरीय छनोट प्रतियोगिता कात्तिक २८ गतेदेखि मङ्सिर १ गतेसम्म सञ्चालन हुने कार्यक्रम रहेको छ ।
दशौँ बृहत् राष्ट्रिय खेलकुद प्रतियोगितालाई लक्षित गर्दै भइरहेको छनोट प्रक्रियाले प्रदेशका प्रतिभाशाली खेलाडीलाई राष्ट्रिय स्तरमा आफ्नो क्षमता प्रदर्शन गर्ने अवसर प्रदान गर्नेछ । करातेमा छनोट भएका २१ खेलाडीले राष्ट्रिय प्रतियोगितामा उत्कृष्ट प्रदर्शन गर्दै सुदूरपश्चिमका लागि पदक दिलाउने अपेक्षा गरिएको छ ।
फेसबुकबाट तपाईको प्रतिक्रिया