काठमाडौं । धादिङको रुबीभ्याली गाउँपालिकामा बोलेरो गाडी दुर्घटना हुँदा एक महिलाको मृत्यु भएको छ भने नौ जना घाइते भएका छन् । उकालो सडकमा अनियन्त्रित भएको बोलेरो करिब ४०० मिटर तल खसेको प्रहरीले जनाएको छ ।
प्रहरीका अनुसार रुबीभ्याली गाउँपालिका–४ स्थित कलदाङमा गएराति करिब १ बजेर ५५ मिनेटमा दुर्घटना भएको हो । लापाबाट बोराङतर्फ जाँदै गरेको बोलेरो गाडी उकालो सडकमा अनियन्त्रित भएपछि सडकबाट तल खसेको थियो ।
दुर्घटनाका बेला गाडीमा चालकसहित १० जना सवार थिए । गाडी करिब ४०० मिटर तल खस्दा त्यसमा सवार स्थानीय ६६ वर्षीया छेनेन तामाङको घटनास्थलमै मृत्यु भएको प्रहरीले जनाएको छ ।
दुर्घटनामा गाडीमा सवार अन्य नौ जना घाइते भएका छन् । घाइतेहरूको स्थानीय मेडिकलमा उपचार भइरहेको छ ।
दुर्घटनाको खबर प्राप्त भएपछि घटनाबारे जानकारी लिने तथा आवश्यक प्रक्रिया अघि बढाउने काम भइरहेको छ । दुर्घटना के कारणले भयो भन्नेबारे भने थप विवरण आउन बाँकी रहेको प्रहरीले जनाएको छ ।
रातिको समयमा भएको दुर्घटनामा एक जनाको ज्यान गएको र नौ जना घाइते भएपछि घटनाबारे थप अनुसन्धान भइरहेको छ ।
फेसबुकबाट तपाईको प्रतिक्रिया