लुलासँग चुनाव हारेपछि बोल्सोनारो परिवारलाई अमेरिकी भिसा, ब्राजिल–अमेरिका तनाव बढ्ने संकेत

ब्राजिलको राष्ट्रपतीय निर्वाचनमा राष्ट्रपति लुइज इनासियो लुला दा सिल्भासँग पराजित सिनेटर फ्लाभियो बोल्सोनारो र उनको परिवारलाई अमेरिकाले भिसा दिने निर्णय गरेको छ । अमेरिकी विदेश मन्त्रालयका एक वरिष्ठ अधिकारीले अक्टोबर २७ मा यसबारे जानकारी दिएका हुन् ।

पूर्वराष्ट्रपति जायर बोल्सोनारोका छोरा फ्लाभियोले निर्वाचनको परिणाम स्वीकार गरिसकेका छैनन् । उनले निर्वाचनमा अनियमितता भएको दाबी गर्दै परिणाम चुनौती दिने बताएका थिए । अमेरिकी निर्णय यस्तो समयमा आएको हो, जब ब्राजिलको सर्वोच्च अदालतले फ्लाभियोलाई राहदानी बुझाउन र देश छाड्न रोक लगाउने आदेश दिएको थियो ।

सम्पत्ति शुद्धीकरणसम्बन्धी अनुसन्धानका क्रममा अदालतले यस्तो आदेश दिएको हो । निर्धारित समयभित्र राहदानी नबुझाएपछि ब्राजिलको संघीय प्रहरीले उनका राहदानी रद्द गरेको जनाएको छ । उनीमाथि लागेको आरोपबारे फ्लाभियोले भने कुनै गलत काम नगरेको दाबी गर्दै आएका छन् ।

अमेरिकी राष्ट्रपति डोनाल्ड ट्रम्प र बोल्सोनारो परिवारबीच लामो समयदेखि राजनीतिक निकटता रहँदै आएको छ । ट्रम्पले पूर्वराष्ट्रपति जायर बोल्सोनारोमाथिको कानुनी कारबाहीलाई राजनीतिक प्रतिशोधका रूपमा व्याख्या गर्दै आएका छन् । ब्राजिलका पूर्वराष्ट्रपति जायरलाई सन् २०२२ को निर्वाचनको परिणाम उल्ट्याउने प्रयाससम्बन्धी मुद्दामा २७ वर्षको जेल सजाय सुनाइएको थियो । यही पृष्ठभूमिमा फ्लाभियो र उनको परिवारलाई भिसा दिने अमेरिकी निर्णयले दुई देशबीचको राजनीतिक मतभेद थप चर्किन सक्ने देखिएको छ ।

ब्राजिलका राष्ट्रपति लुलाले फ्लाभियोको देश छाड्ने निर्णयको आलोचना गरेका छन्। उनले बोल्सोनारो परिवारले आफ्नो राजनीतिक स्वार्थका लागि अमेरिकी हस्तक्षेपलाई प्रोत्साहन गरेको आरोप लगाएका छन् ।