काठमाडाैं । मलेसियामा जारी एसीसी महिला प्रिमियर कप क्रिकेटमा नेपालले भुटानलाई ५१ रनकाे फराकिलाे अन्तरले पराजित गर्दै लगातार दोस्रो जित हात पारेकाे छ । मलेसियामा बिहीबार भएकाे खेलमा नेपालले दिएको १ सय १४ रनको लक्ष्य पछ्याएको भुटानले निर्धारित २० ओभरमा ८ विकेट गुमाएर ६२ रन मात्र बनाउन सकेकाे हाे ।
भुटानका लागि डेचेन वाङ्मोले ६० बलमा सर्वाधिक ३९ रन बनाएकी हुन् । चाडो ओमले ११ रन जोड्दा अन्य ब्याटरले दोहोरो अङ्कमा रन बनाउन सकेनन् । नेपालको बलिङतर्फ रुबिना क्षेत्रीले ३ तथा रिया शर्माले २ विकेट लिएकी छन् ।
कविता कुँवर र मनिषा उपाध्यायले समान १-१ विकेट लिएका थिए । यसअघि टस हारेर पहिले ब्याटिङको निम्तो पाएको नेपाल २० ओभरमा १ सय १३ रन बनाएर अलआउट भएको थियो । नेपालका लागि सीता राना मगरले २८ बलमा सर्वाधिक ३७ रन बनाएकी हुन् । रुबिना क्षेत्रीले २४ रन जोडिन् भने सोनी पाख्रिनले १३ र सम्झना कुमारीले १० रन बनाएकी छन् ।
भुटानका लागि सोनाम र छेरिङ जाङ्मोले समान ३/३ विकेट लिएका थिए । पहिलो खेलमा बुधबार कतारलाई ८ विकेटले पराजित गरेको नेपाल समूह ‘डी’ मा लगातार दोस्रो जित हात पार्न सफल भएको हो । नेपाल रहेको समूहमा कतार, भुटान र हङकङ रहेका छन् ।
नेपालले समूह चरणको अन्तिम खेल शनिबार हङकङसँग खेल्ने तालिका रहेकाे छ । महिला टी–२० एशिया कप छनोट प्रतियोगिता समेत रहेको एसीसी महिला प्रिमियर कपमा १८ टोली सहभागी छन् । प्रतियोगिताबाट उत्कृष्ट चार टोली महिला एशिया कपका लागि छनोट हुने भएका हुन् ।
फेसबुकबाट तपाईको प्रतिक्रिया