विश्व सुर्तीजन्य पदार्थविरूद्धको दिवस आज नेपालमा पनि चेतनामूलक कार्यक्रम गरी मनाइँदै

काठमाडौं ।  विश्व सुर्तीजन्य पदार्थविरुद्धको दिवस आइतबार नेपालसहित विश्वका विभिन्न देशमा चेतनामूलक कार्यक्रम गरी मनाइँदैछ ।

विश्व स्वास्थ्य सङ्गठन (डब्लयूएचओ) ले नेपालमा सुर्तीजन्य पदार्थका कारण वार्षिक ३९ हजार जनाले ज्यान गुमाउने गरेको जनाएकाे हाे। त्यस्तै, विश्वभर १ अर्ब ३० करोड मानिसले सुर्तीजन्य पदार्थको प्रयोग गर्छन् । विश्वमा सुर्तीजन्य पदार्थका कारण हरेक वर्ष ८० लाख भन्दा बढी मानिसले ज्यान गुमाउने गरेका छन् ।

हरेक वर्ष मे ३१ तारिखमा मनाइने यो दिवसको उद्देश्य सुर्तीजन्य पदार्थको प्रयोगबाट हुने स्वास्थ्य जोखिम, सुर्ती उद्योगका व्यावसायिक रणनीति, सुर्ती नियन्त्रणका लागि डब्लयूएचओले गरिरहेका प्रयास तथा स्वस्थ जीवनयापन र भावी पुस्ताको संरक्षणका लागि आवश्यक कदमबारे चेतना फैलाउनु हो ।

यस वर्षको दिवसको अवसरमा डब्लयूएचओले सरकारहरूलाई नयाँ पुस्तालाई सुर्तीजन्य तथा निकोटिनयुक्त उत्पादनको लतबाट जोगाउन विशेष आग्रह गरेको छ । डब्लयूएचओले विश्वभर किशोर उमेर समूहमा विद्युतीय चुरोट (ई–सिगरेट) र निकोटिन पाउचको प्रयोग निरन्तर बढिरहेको जनाएकाे हाे ।

विशेषगरी स्वादयुक्त ई–सिगरेट, निकोटिन पाउच तथा अन्य निकोटिनजन्य उत्पादनमार्फत तिनले किशोर र युवालाई अम्मली बनाएका डब्लयूएचओले बताएकाे छ। निकोटिन अत्यधिक लत लाग्ने र स्वास्थ्यका लागि हानिकारक पदार्थ भएकाले विशेषगरी मस्तिष्क विकासको चरणमा रहेका बालबालिका तथा किशोर तथा युवाका लागि यसको असर गम्भीर हुनसक्ने डब्लूएचओले जनाएको हाे ।

स्वादयुक्त निकोटिनजन्य उत्पादनमाथि प्रतिबन्ध लगाउन, विज्ञापन, प्रवर्द्धन तथा प्रायोजन रोक्न, सार्वजनिक ठाउँमा पूर्ण रूपमा धूमपान तथा भेप-मुक्त क्षेत्र घोषणा गर्न तथा कानूनी कार्यान्वयनलाई थप प्रभावकारी बनाउन डब्लयूएचओले आग्रह गरेको छ ।