कांग्रेस दोस्रो विशेष महाधिवेशनको बन्दसत्र आज बिहान ९ बजेदेखि पुनः सुरु

काठमाडौं । नेपाली कांग्रेसको काठमाडौंस्थित भृकुटीमण्डपमा जारी दोस्रो विशेष महाधिवेशनअन्तर्गत बन्दसत्र मंगलबार बिहान ९ बजेदेखि पुनः सुरु हुने भएको छ।

यही पुस २७ र २८ गतेका लागि तय गरिएको दोस्रो विशेष महाधिवेशन समय अभावका कारण कार्यतालिका संशोधन गरिएको हो। सोमबार बन्दसत्र सुरु भई विभिन्न प्रतिवेदनमाथिको छलफल लम्बिएपछि कार्यतालिका परिमार्जन गर्नुपरेको दोस्रो विशेष महाधिवेशन व्यवस्थापन सचिवालयका संयोजक मनोजमणि आचार्यले जानकारी दिनुभयो।

उहाँका अनुसार मंगलबार पनि महाधिवेशन प्रतिनिधिहरूको दर्ता प्रक्रिया निरन्तर रूपमा जारी रहनेछ। विशेष महाधिवेशन पक्षधरहरूले महाधिवेशनमा सहभागी भई हस्ताक्षर गर्ने प्रतिनिधिको संख्या ७० प्रतिशत पुर्‍याउने दाबी गरेका छन्।

सोमबार साँझ सञ्चारकर्मीसँग कुरा गर्दै नेता सुवास पोखरेलले विशेष महाधिवेशनको पक्षमा हस्ताक्षर गर्ने प्रतिनिधिको संख्या आइतबार २ हजार ६ सय ६२ रहेकोमा सोमबार ६ दशमलव २४ प्रतिशतले वृद्धि भएको बताउनुभयो।

मंगलबार नेतृत्व चयनका लागि बन्दसत्र सुरु हुने र सोही दिन निर्वाचन, अनुशासन तथा केन्द्रीय समिति लगायतका समितिहरू भंग गरिने पनि उहाँले जानकारी दिनुभयो। यसैबीच संस्थापन पक्षलाई सहमतिमा ल्याउने प्रयास जारी रहेको छ। यसका लागि सभापति शेरबहादुर देउवा र विशेष महाधिवेशन आयोजना गरिरहेका नेताबीच मंगलबार पनि छलफल हुने भएको छ।

उक्त वार्तामा विशेष महाधिवेशन गराइरहेका गगन–विश्व समूहबाट प्रदीप पौडेल, देवराज चालिसे, गुरुराज घिमिरे र मधु आचार्य सहभागी हुने जनाइएको छ।