कांग्रेस भित्र असहमति: गगन थापाले अर्जुननरसिंह केसीको सूचीबारे आलोचना गरे

काठमाडौँ । नेपाली काँग्रेसका महामन्त्री गगन थापाले पार्टीका नेता अर्जुननरसिंह केसीलाई समानुपातिक सूचीमा राखिनु आफ्नो चाहनाको विपरीत भएको बताएका छन् ।

आज सामाजिक सञ्जाल फेसबुकमा एक स्ट्याटस लेख्दै उनले यस्तो बताएका हुन् ।

उनले नेता केसीलाई आफ्नो प्रयासमा समानुपातिक सूचीमा राखिएको भन्ने हल्ला फैलाइएको बताए ।

उनले भनेका छन् ‘म स्पष्ट पार्न चाहन्छु, यो मेरो चाहना विपरीत हो । मेरो अनुरोध र हर सम्भव प्रयास विपरीतको निर्णय हो । मेरो र उहाँको आ-आफ्ना राजनीतिक दृष्टिकोण र निर्णयहरू हुन्छन्, कहिले मिल्छन्, कहिले बाझिन्छन् । जसरी कुनै बेला हाम्रो राजनीतिक दृष्टिकोण र प्राथमिकता मिलेन र एक अर्कासँग पार्टीको महामन्त्री पदका लागि फरक एजेन्डा र सङ्कल्पसहित चुनाव लड्यौँ । यसपटक पनि पार्टीका अग्रज नेताले समानुपातिक प्रणाली रोज्ने वा नरोज्ने विषयमा हाम्रो मत भिन्नता रह्यो ।’

उनले यसपटक पनि नेता केसीसँग समानुपातिक प्रणाली रोज्ने वा नरोज्ने विषयमा हाम्रो मत भिन्नता रहेको बताए ।