पश्चिमी न्यून चापीय प्रणालीको प्रभाव: देशभर बदली, वर्षा र हावाहुरीको सम्भावना

काठमाडौं। हाल नेपालमा पश्चिमी न्यून चापीय प्रणाली र स्थानीय वायुको प्रभाव रहेको मौसम पूर्वानुमान महाशाखाले जनाएको छ।

महाशाखाका अनुसार बागमती, लुम्बिनी, गण्डकी र कर्णाली प्रदेशलगायत देशका हिमाली भू-भागमा साधारणतया बदली रहेको छ भने अन्य स्थानमा आंशिक बदली रहेको छ।

आज दिउँसो हिमाली भू-भागसहित गण्डकी, लुम्बिनी, कर्णाली र सुदूरपश्चिम प्रदेशका पहाडी क्षेत्रमा सामान्य बदली रहनेछ भने अन्य क्षेत्रमा आंशिक बदली रहनेछ। गण्डकी, कर्णाली र सुदूरपश्चिमका पहाडी तथा हिमाली क्षेत्रका केही स्थानमा मेघगर्जन/चट्याङसहित मध्यम वर्षा वा हिमपातको सम्भावना रहेको छ। साथै अन्य पहाडी तथा हिमाली क्षेत्रका एक–दुई स्थानमा हल्का वर्षा/हिमपात हुन सक्ने जनाइएको छ।

कोशी, मधेश, बागमती, गण्डकी र लुम्बिनी प्रदेशका तराई क्षेत्रमा केही स्थानमा हावाहुरीको सम्भावना पनि रहेको छ।

आज राति पनि पहाडी तथा हिमाली क्षेत्रमा सामान्य बदली रहनेछ। गण्डकी, कर्णाली र सुदूरपश्चिमका पहाडी तथा हिमाली क्षेत्रका केही स्थानमा मेघगर्जनसहित मध्यम वर्षा/हिमपात तथा अन्य क्षेत्रमा हल्का वर्षा/हिमपातको सम्भावना रहेको छ। तराईका केही स्थानमा हावाहुरी चल्ने सम्भावना कायमै रहने महाशाखाले जनाएको छ।