इलामका दुई पालिकाद्वारा भोटेकोशी बाढीपीडितलाई ३५ लाख सहयोगको घोषणा

इलामका दुई पालिकाले रसुवाको भोटेकोशी नदीमा आएको बाढी प्रभावितलाई नागरिकको उद्धार,उपचार तथा राहतका लागि रु ३५ लाख सहयोग गर्ने घोषणा गरेका छन् । जिल्लाको चुलाचुली गाउँपालिकाले रु २५ लाख र माई नगरपालिकाले रु १० लाख प्रधानमन्त्री दैवीप्रकोप उद्घार कोषमा जम्मा गर्ने निर्णय गरेका छन् । बिहीबार बसेको चुलाचुली गाउँपालिकाको ७६औँ बैठकले सो निर्णय गरेको हो ।

गाउँपालिका अध्यक्ष र उपाध्यक्षद्वारा सात दिनको र वडाध्यक्ष तथा सदस्यद्वारा पाँच दिनको सेवासुविधा प्रधानमन्त्री दैवीप्रकोप उद्घार कोषमा जम्मा गर्ने निर्णय गरिएको गाउँपालिका अध्यक्ष राजेन्द्र केरुङले बताए । अध्यक्ष केरुङका अनुसार गाउँपालिकाका विभिन्न तहका कर्मचारीको पारिश्रमिक उपलब्ध गराउने निर्णय भएको छ । भोटेकोशी बाढीबाट प्रभावित नागरिकको उद्धार, उपचार तथा राहतमा टेवा पुग्ने विश्वाससहित आवश्यक सहयोग उपलब्ध गराउने निर्णय गरेको अध्यक्ष केरुङले बताए ।

जनप्रतिनिधि तथा शिक्षक कर्मचारीको तर्फबाट रु २५ लाख सङ्कलन गरी जम्मा गर्ने उहाले जानकारी दिएको हो । यता बिहीबार नै बसेको माई नगरपालिकाको ६५औँ कार्यपालिका बैठकले सबै जनप्रतिनिधि तर्फबाट १५ दिनको सेवासुविधा र कर्मचारीको तर्फबाट दुई दिनको पारिश्रमिक प्रधानमन्त्री दैवीप्रकोप उद्घार कोषमा जम्मा गर्ने निर्णय गरेको नगरप्रमुख खम्बासिंह लिम्बूले जानकारी दिए । जनप्रतिनिधि र कर्मचारीबाट सङ्कलित रकममा नगरपालिकाको विपद् व्यवस्थापन कोषबाट रकम थप गरी रु १० लाख पुर्याइने उहाको भनाई रहेको छ । इलाममा चार नगरपालिकासहित १० स्थानीय तह रहेका छन् ।