19
Shares
काठमाडौँ । अख्तियार दुरुपयोग अनुसन्धान आयोगले मुगुमा विद्युत् निर्माणका लागि विनियोजित रकम काम नगरी हिनामिना गरेको आरोपमा खानेपानी, सिँचाइ तथा ऊर्जा विकास कार्यालय मुगुका तत्कालीन कार्यालय प्रमुख राजीव रिमालसहित आठ जनाविरुद्ध विशेष अदालत, काठमाडौँमा आरोपपत्र दायर गरेको छ।
आयोगका अनुसार अदानचुली गाउँपालिकाको कुकुर फाल्ना छहराखेतदेखि मुगुको सोरू गाउँपालिका–३, भिईसम्म विद्युत् निर्माणका लागि विनियोजन भएको रकमबाट तोकिएको काम नगरी रु ९ लाख २६ हजार रकम हिनामिना गरी गैरकानुनी लाभ वा हानि पुर्याएको आरोपमा मुद्दा दायर गरिएको हो।
अख्तियारका प्रवक्ता सुरेश न्यौपानेका अनुसार मुद्दा दायर गरिएकामा खानेपानी, सिँचाइ तथा ऊर्जा विकास कार्यालय मुगुका तत्कालीन कार्यालय प्रमुख राजीव रिमाल, तत्कालीन सव–इन्जिनियर विश्वराज भण्डारी र तत्कालीन लेखापाल रूनबहादुर सेजुवाल रहेका छन्।
त्यस्तै, सोरू गाउँपालिका–३ का तत्कालीन वडाध्यक्ष लालु धामी तथा गल्फागाढ छहराखेत जलविद्युत् आयोजना उपभोक्ता समितिका अध्यक्ष प्रदीप बुढा, उपाध्यक्ष भीमचन्द्र बुढा, सचिव धनराज बुमी र कोषाध्यक्ष लक्ष्मी धामीविरुद्ध पनि आरोपपत्र दायर गरिएको छ।
आयोगले उनीहरूविरुद्ध भ्रष्टाचार निवारण ऐन, २०५९ को दफा ८ को उपदफा (१) को देहाय (ङ) बमोजिमको कसुर गरेको आरोप लगाएको छ। मुद्दामा रु ९ लाख २६ हजारलाई बिगो कायम गरिएको आयोगले जनाएको छ।
आयोगका अनुसार विद्युत् निर्माणका लागि सरकारी बजेट विनियोजन भए पनि सम्झौताअनुसार काम सम्पन्न नगरी रकम भुक्तानी तथा खर्च गरिएको विषयमा अनुसन्धान गरिएको थियो। अनुसन्धानका क्रममा सरकारी स्रोतको रकम निर्धारित उद्देश्यअनुसार प्रयोग नभएको निष्कर्षसहित सम्बन्धित व्यक्तिहरूविरुद्ध कानुनी कारबाही अघि बढाइएको हो।
विशेष अदालतमा आरोपपत्र दायर भएसँगै अब उक्त आरोपसम्बन्धी न्यायिक प्रक्रिया अघि बढ्नेछ। आरोपपत्रमा उल्लेखित कसुर अदालतबाट प्रमाणित हुन बाँकी रहेको छ। अदालतको अन्तिम निर्णयपछि मात्र आरोपित व्यक्तिहरूको कानुनी जिम्मेवारीबारे निष्कर्ष आउनेछ।
फेसबुकबाट तपाईको प्रतिक्रिया