सत्ता साझेदार दलभित्रको आन्तरिक विवादले बागमतीका मुख्यमन्त्रीलाई सकस

काठमाडौं । बागमती प्रदेशसभाको बैठक भोलि अपराह्न ४ः०० बजे हुने भएको छ । बैठक प्रदेशका मुख्यमन्त्री किरण थापाले विश्वासको मत लिने प्रयोजनका लागि आह्वान भएको हो ।

आज साँझ ८ः०० बजेका निर्धारण गरिएको बैठक भोलिका लागि सारिएको प्रदेशसभा सचिव रामकुमार पौडेलले जानकारी दिए । प्रदेशसभा नियमावली, २०७४ को नियम ६ को उपनियम (३) बमोजिम सभामुखले बैठकको मिति र समय परिवर्तन गरेको उनले बताए ।

मुख्यमन्त्री थापाले विश्वासको मत लिने कार्यसूची रहेका कारण मंगलबारको बैठकलाई राजनीतिक रूपमा महत्त्वपूर्ण मानिएको छ। आजको बैठकमा विश्वासको मत दिने सत्ता साझेदार नेकपाका सात सांसद अनुपस्थित भएपछि मुख्यमन्त्री थापा थप दबाबमा परेका हुन् ।

मन्त्री बन्न नपाएको भन्दै असन्तुष्ट रहेका युवराज चौलागाईं, रुकु चौलागाईं, उर्मिला लामा, गङ्गा नारायण श्रेष्ठ, लक्ष्मण लम्साल, कृष्ण खनालसहित सात सांसद काठमाडौंमा रहेको बताइएको छ। बागमतीमा कांग्रेस नेतृत्वको सरकार ढलेपछि एमालेका किरण थापा नेकपा र राप्रपाको समर्थनमा मुख्यमन्त्री बनेका हुन् । तर सरकार गठनमा समर्थन गरेका दुवै दलभित्र आन्तरिक विवाद देखिएको छ ।