14
Shares
काठमाडौं । श्रम संस्कृति पार्टीका अध्यक्ष हर्कराज राईले प्रधानमन्त्री बालेन्द्र साहले संसदमा दिएको सीमा सम्बन्धी अभिव्यक्ति राष्ट्रहितविपरीत रहेको भन्दै सदनमा आएर माफी माग्नुपर्ने बताएका छन् ।
मंगलबार प्रतिनिधि सभा बैठकपछि सञ्चारकर्मीसँग कुरा गर्दै राईले प्रधानमन्त्रीको ‘नेपालले पनि भारतको सीमा मिचेको रहेछ’ भन्ने अभिव्यक्तिले देशको भौगोलिक अखण्डता, सार्वभौमसत्ता र राष्ट्रिय सुरक्षामाथि नै प्रश्न उठाएको बताए ।
उनले प्रधानमन्त्रीको अभिव्यक्तिपछि विभिन्न क्षेत्रमा नकारात्मक असर देखिन थालेको दाबी गर्दै उक्त भनाइ तत्काल सच्याउनुपर्ने बताए ।
‘कार्यकारी प्रमुखले त्यसरी बोल्न मिल्दैन,’ राईले भने, ‘उहाँले आफ्नो गलत भनाइ सच्याउँदै संसदमा आएर माफी माग्नुपर्छ ।’
राईले प्रधानमन्त्रीले नेपालले भारतको कहाँ र कति भूभाग मिचेको हो भन्ने तथ्यसहित स्पष्ट पार्नुपर्ने माग पनि गरे ।
प्रधानमन्त्रीको अभिव्यक्तिबारे शंका व्यक्त गर्दै उनले उक्त टिप्पणी भारतलाई सन्तुष्ट पार्ने उद्देश्यले गरिएको हो कि भन्ने प्रश्नसमेत उठाए ।
उनले प्रधानमन्त्रीले संसदमा माफी नमागेसम्म अन्य विषयमा छलफल हुन नसक्ने स्पष्ट पार्दै राष्ट्रियता र सीमासम्बन्धी विषय बजेटभन्दा पनि महत्वपूर्ण रहेको बताए ।
‘राष्ट्रहित र राष्ट्रियताको विषयभन्दा ठूलो बजेट हुन सक्दैन,’ उनले भने, ‘प्रधानमन्त्रीले आफ्नो अभिव्यक्तिबारे स्पष्टता नदिएसम्म संसदको अवरोध हट्ने अवस्था छैन ।’
फेसबुकबाट तपाईको प्रतिक्रिया