मकवानपुरमा आगलागी, पाँच लाख बराबरको क्षति

काठमाडौं । थाहा नगरपालिका–६ स्थित बज्रबाराही बजारमा बिजुलीको तार सर्ट हुँदा आगलागी भएको छ।

आइतबार राति भएको आगलागीबाट बज्रबाराही लिलाखेलका सूर्यबहादुर बलामीको कपडा सिलाउने पसलमा ठूलो क्षति पुगेको प्रहरीले जनाएको छ। आगलागीमा पसलभित्र रहेका कपडा तथा सिलाउने मेसिन जलेर नष्ट भएका छन्।

बागमती प्रदेश प्रहरी कार्यालयका अनुसार उक्त आगलागीबाट करिब पाँच लाख रुपैयाँ बराबरको क्षति भएको अनुमान गरिएको छ।

स्थानीयवासीको सहयोगमा आगो करिब एक घण्टापछि नियन्त्रणमा आएको थियो। घटनास्थलमा अस्थायी प्रहरी पोष्ट बज्रबाराहीबाट प्रहरी सहायक हवल्दार मानबहादुर रुम्बाको नेतृत्वमा तीन जनाको टोली खटिएको थियो।

प्रहरीका अनुसार आगलागीमा कुनै मानवीय तथा चौपाया क्षति भने भएको छैन।