सरकारले राष्ट्रपतिसमक्ष सिफारिस गर्‍यो अर्को अध्यादेश

काठमाडौं । सरकारले सम्पत्ति शुद्धीकरणसम्बन्धी ऐन संशोधन गर्न अध्यादेश राष्ट्रपति कार्यालय पठाएको छ ।

राष्ट्रपति कार्यालयका प्रवक्ता रितेशकुमार शाक्यका अनुसार उक्त अध्यादेश दर्ता भई अध्ययनको क्रममा रहेको छ । ‘सम्पत्ति शुद्धीकरणसम्बन्धी अध्यादेश यसअघि नै आएको हो, अहिले अध्ययनकै क्रममा छ,’ उनले भने ।

सरकारले कुल ८ वटा अध्यादेश राष्ट्रपति कार्यालय पठाएको जनाएको छ । तीमध्ये सहकारी र सार्वजनिक खरिदसम्बन्धी अध्यादेश भने जारी भइसकेका छन् ।

बाँकी ६ वटा अध्यादेशहरू अध्ययनकै क्रममा रहेको प्रवक्ता शाक्यले बताए ।

यसैबीच, संवैधानिक परिषद्सम्बन्धी लगायत केही अध्यादेशका विषयमा राष्ट्रपति रामचन्द्र पौडेलले बिहीबार कानुनविद्हरूसँग छलफलसमेत गरेका थिए ।