प्रधानमन्त्रीले आफ्ना मान्छेलाई प्रधानन्यायाधीश बनाउन अनेक जालझेल गर्दैछन्ः गगन थापा

काठमाडौं । प्रमुख प्रतिपक्ष दल नेपाली कांग्रेसका सभापति गगनकुमार थापाले प्रधानमन्त्री बालेन्द्र साहले आफ्ना अनुकूल व्यक्तिलाई प्रधानन्यायाधीश बनाउन जालझेल गरिरहेको आरोप लगाएका छन् ।

बुधबार पार्टी संसदीय दलको बैठकपछि सञ्चारकर्मीसँग कुरा गर्दै थापाले संवैधानिक परिषद् सम्बन्धी अध्यादेश ल्याएर प्रधानमन्त्रीले नियुक्ति प्रक्रियामाथि नियन्त्रण जमाउन खोजेको दाबी गरे । संसदको अधिवेशन आह्वान र स्थगनसम्बन्धी गतिविधि पनि सोही उद्देश्यका लागि गरिएको उनको आरोप छ ।

थापाका अनुसार प्रधानमन्त्री साहले संवैधानिक परिषद्मा आफ्नो प्रभाव कायम गर्दै आफूले चाहेको व्यक्तिलाई प्रधानन्यायाधीश बनाउने तयारी गरिरहेका छन्, जुन प्रक्रिया पारदर्शी र प्रतिस्पर्धात्मक हुनुपर्नेमा त्यसको विपरीत भइरहेको छ ।

उनले यसअघि पनि यस्तै प्रकारका प्रयास भएको उल्लेख गर्दै अहिलेको अवस्था पनि त्यही प्रवृत्तिको निरन्तरता भएको बताए । ‘आफ्नो अनुकूल व्यक्तिलाई नियुक्त गर्न गरिएको यस्तो जालझेल आपत्तिजनक छ,’ उनले भने ।

सभापति थापाले यस्तो निर्णय नेपाली कांग्रेसलाई स्वीकार्य नहुने स्पष्ट पार्दै संसदभित्र र बाहिर यसको विरोध गरिने बताए ।

प्रधानमन्त्री साहले बिहीबार अपराह्न ५ बजेका लागि संवैधानिक परिषद्को बैठक बोलाएका छन् । थापाले उक्त बैठक पनि प्रधानन्यायाधीश नियुक्तिको तयारीकै हिस्सा भएको दाबी गरेका छन् ।