राष्ट्र बैंकले २० अर्ब रुपैयाँ बराबरको ऋणपत्र जारी गर्न तयारी

काठमाडौं । नेपाल राष्ट्र बैंकले चालु आर्थिक वर्षमा आठौं पटक २० अर्ब रुपैयाँ बराबरको ‘नेपाल राष्ट्र बैंक ऋणपत्र २०८३ ज’ जारी गर्न लागेको छ।

केन्द्रीय बैंकले पुस १४ गते पहिलो पटक २५ अर्ब रुपैयाँ बराबरको ‘ऋणपत्र २०८३ क’ जारी गरेको थियो भने सोमबार पनि २५ अर्बको बन्ड जारी गरेको थियो। मंगलबार जारी हुने नयाँ ऋणपत्र एक वर्ष अवधिको हुनेछ।

ऋणपत्र अनलाइनमार्फत आवेदन दिन सकिने व्यवस्था रहेको राष्ट्र बैंकले जानकारी दिएको छ। यसमा राष्ट्र बैंकबाट इजाजतपत्र प्राप्त क, ख, र ग वर्गका बैंक तथा वित्तीय संस्था (काउन्टरपार्टी) मात्रै सहभागी हुन पाउने छन्। इच्छुक बैंक तथा वित्तीय संस्थाले न्यूनतम ५ करोड रुपैयाँ र बढीमा ५ करोड रुपैयाँले भाग लिँदै कुल आह्वान रकमसम्म आवेदन दिन सक्ने व्यवस्था रहेको छ।

राष्ट्र बैंकले केही समयअघिसम्म निक्षेप संकलन उपकरण वा रिभर्स रिपोमार्फत तरलता व्यवस्थापन गर्दै आएकोमा पछिल्लो समय ऋणपत्रमा जोड दिँदै आएको छ।