कतारमा नेपाली श्रमिकका हकहितका लागि १९ वर्षदेखि सक्रिय मोहम्मद रमजान

वैदेशिक रोजगारीका लागि कतार पुगेका नेपाली श्रमिकले भोग्ने समस्या समाधानमा सहयोग गर्दै आएका मोहम्मद रमजान अली मियाँ प्रवासी नेपालीका लागि सहयोगी व्यक्तिका रूपमा स्थापित भएका छन् ।

करिब १९ वर्षदेखि कतारमा रहेका उनी श्रमिकका अधिकार, कानुनी सहायता र मानवअधिकारका विषयमा निरन्तर सक्रिय छन् । अरबी भाषा र साहित्यमा उच्च शिक्षा हासिल गरेका रमजानले कतारमा नेपाली श्रमिकले भोग्ने समस्यालाई त्यहाँको भाषामै उठाउने प्रयास गरका हुन ।

नेपाली कामदारका समस्या र समाधानका उपायबारे अरबी भाषामा लेख लेखेपछि सम्बन्धित निकायले उनीसँग सोधपुछसमेत गरेको थियो । नेपाली श्रमिकका गुनासा नजिकबाट बुझेका उनले समस्याको समाधानका लागि सम्बन्धित निकायसँग समन्वय गर्दै आएका छन् । श्रमिकले आफ्नो अधिकार बुझ्न सकून् भन्ने उद्देश्यले उनले सन् २००९ मा कतारको श्रम कानुन नेपाली भाषामा अनुवाद गरेका थिए ।

पारिश्रमिक नपाउने, श्रम शोषणमा पर्ने र मानवअधिकार उल्लङ्घनका घटनामा परेका नेपालीलाई कानुनी जानकारी तथा सहयोग उपलब्ध गराउन उनले विभिन्न पुस्तक र निर्देशिकासमेत तयार पारेका छन् । नेपाली समुदायलाई कतारका विभिन्न सामाजिक तथा मानवीय संस्थासँग जोड्न पनि उनले भूमिका खेलेका छन् । रमजानको योगदान श्रमिकका समस्या समाधानमा मात्र सीमित छैन ।

सन् २०१५ मा नेपालमा गएको भूकम्पका पीडितका लागि कतार टेलिभिजनमार्फत सञ्चालन गरिएको अभियानबाट करिब तीन करोड कतारी रियाल सहयोग सङ्कलन गर्न उनले पहल गरेका थिए ।

नेपाली भाषा, कला र संस्कृतिको पहिचान विस्तार तथा नेपाल–कतारबीच सहकार्य बढाउने प्रयासमा समेत सक्रिय रहेका रमजानको कामले प्रवासमा श्रमिकको अधिकार र मानवीय सहयोगको महत्त्वलाई उजागर गरेको छ ।