काभ्रेका १२ स्थानीय तहमा कांग्रेसको नयाँ नेतृत्व चयन, खानीखोलाको विवरण आउन बाँकी

काभ्रेपलाञ्चोक । नेपाली कांग्रेसको १५औँ महाधिवेशनको विधानअनुसार काभ्रेपलाञ्चोक जिल्लाका अधिकांश स्थानीय तहमा नगर तथा गाउँ कार्यसमितिको निर्वाचन प्रक्रिया सम्पन्न भएको छ । निर्वाचन तथा सर्वसम्मत प्रक्रियाबाट जिल्लाका विभिन्न पालिकामा नयाँ नेतृत्व चयन गरिएको हो ।

काभ्रेपलाञ्चोकका १३ स्थानीय तहमध्ये हालसम्म १२ पालिकामा नगर तथा गाउँ कार्यसमितिको नेतृत्व चयन भएको छ । खानीखोला गाउँपालिकाको निर्वाचित कार्यसमितिको विवरण भने सार्वजनिक हुन बाँकी रहेको छ ।

निर्वाचनबाट बनेपा नगर कार्यसमितिको सभापतिमा राम जोशी बहुमतसहित निर्वाचित हुनुभएको छ । त्यस्तै, मण्डनदेउपुर नगर कार्यसमितिको सभापतिमा रामहरि सापकोटा सर्वसम्मत निर्वाचित हुनुभएको छ ।

पाँचखाल नगर कार्यसमितिको सभापतिमा सञ्जय तामाङ दोस्रो कार्यकालका लागि सर्वसम्मत चयन हुनुभएको छ भने पनौती नगर कार्यसमितिको सभापतिमा नेपाल विद्यार्थी संघका पूर्व नेता रूपक महत सर्वसम्मत निर्वाचित हुनुभएको छ ।

धुलिखेल नगर कार्यसमितिको सभापतिमा विदुर बस्नेत सर्वसम्मत चयन हुनुभएको छ । नमोबुद्ध नगर कार्यसमितिको सभापतिमा कृष्ण लामा बोम्जन निर्वाचित हुनुभएको छ ।

गाउँपालिकातर्फ भुम्लु गाउँ कार्यसमितिको सभापतिमा मञ्जु शाह ठकुरी सर्वसम्मत निर्वाचित हुनुभएको छ । बेथानचोक गाउँ कार्यसमितिको सभापतिमा भने निर्वाचनमार्फत बहुमत प्राप्त गर्दै डिगमान तामाङ नेतृत्वमा आउनुभएको हो ।

यसैगरी तेमाल गाउँ कार्यसमितिको सभापतिमा बिकुलाल तामाङ, रोशी गाउँ कार्यसमितिको सभापतिमा दोर्जे लामा, महाभारत गाउँ कार्यसमितिको सभापतिमा सागर मोक्तान र चौरीदेउराली गाउँ कार्यसमितिको सभापतिमा राजेश गौतम निर्वाचित हुनुभएको छ ।

काभ्रेका स्थानीय तहमा निर्वाचित सभापति

• बनेपा नगरपालिका — राम जोशी
• धुलिखेल नगरपालिका — विदुर बस्नेत
• पनौती नगरपालिका — रूपक महत
• पाँचखाल नगरपालिका — सञ्जय तामाङ
• मण्डनदेउपुर नगरपालिका — रामहरि सापकोटा
• नमोबुद्ध नगरपालिका — कृष्ण लामा बोम्जन
• भुम्लु गाउँपालिका — मञ्जु शाह ठकुरी
• बेथानचोक गाउँपालिका — डिगमान तामाङ
• चौरीदेउराली गाउँपालिका — राजेश गौतम
• तेमाल गाउँपालिका — बिकुलाल तामाङ
• रोशी गाउँपालिका — दोर्जे लामा
• महाभारत गाउँपालिका — सागर मोक्तान
• खानीखोला गाउँपालिका — विवरण आउन बाँकी

नगर तथा गाउँ कार्यसमितिको निर्वाचनबाट सभापतिसहित उपसभापति, सचिव, सहसचिव, कोषाध्यक्ष तथा सदस्य पदमा नयाँ पदाधिकारी तथा सदस्य चयन भएका छन् । नवनिर्वाचित नेतृत्वलाई नेपाली कांग्रेसका नेता तथा कार्यकर्ताहरूले बधाई तथा सफल कार्यकालको शुभकामना व्यक्त गरेका छन् ।

नयाँ कार्यसमितिले स्थानीय तहमा पार्टी संगठनलाई थप व्यवस्थित र सुदृढ बनाउँदै कार्यकर्ताबीचको समन्वय तथा सक्रियता बढाउने अपेक्षा गरिएको छ । साथै, स्थानीय स्तरमा संगठन विस्तार, जनतासँगको सम्बन्ध सुदृढीकरण तथा पार्टीका आगामी गतिविधिलाई प्रभावकारी बनाउन नयाँ नेतृत्वको भूमिका महत्वपूर्ण हुने स्थानीय कांग्रेस नेता–कार्यकर्ताहरूले बताएका छन् ।