जनआकाश मिडियाको १९औँ वार्षिकोत्सव भव्य रूपमा सम्पन्न, विभिन्न क्षेत्रमा योगदान पु¥याएका व्यक्तित्व सम्मानित

काठमाडौं। जनआकाश मिडियाले आफ्नो १९औँ वार्षिकोत्सव भव्य कार्यक्रमका बीच सम्पन्न गरेको छ। काठमाडौंको कमलादीस्थित नेपाल प्रज्ञा–प्रतिष्ठानको लेखनाथ कक्षमा आयोजित समारोह पत्रकारिता, साहित्य, संगीत तथा सामाजिक क्षेत्रका व्यक्तित्वहरूको उल्लेखनीय उपस्थितिका साथ सम्पन्न भएको हो।

जनआकाशका प्रधान सम्पादक तथा सञ्चालक मोहन कार्कीको सभापतित्वमा सम्पन्न कार्यक्रममा निवर्तमान उपसभामुख तथा प्रतिनिधिसभा सदस्य इन्दिरा रानामगर प्रमुख अतिथि रहेकी थिइन्। यस्तै, प्रेस काउन्सिल नेपालका निवर्तमान सदस्य शान्तराम विडारी विशेष अतिथि रहेका थिए।

कार्यक्रममा नेपाल व्यापार संघका अध्यक्ष गिरिराज पोखरेल, सगरमाथा आरोहण संघका अध्यक्ष दिवश पोखरेल, नेपाल जडीबुटी व्यवसायी संघका अध्यक्ष विष्णु भण्डारी, वरिष्ठ पत्रकार भरत ढकाल, सुसेली प्रवर्द्धक दुर्गा अधिकारी भमरकोटे, नेपाल पत्रकार महासंघका केन्द्रीय सदस्य सूर्य सुवेदी लगायत विभिन्न क्षेत्रका प्रतिष्ठित व्यक्तित्वहरूको सहभागिता रहेको थियो।

राष्ट्रिय गीतबाट शुभारम्भ, साहित्य र संगीतले थप्यो रौनक

राष्ट्रिय गीतबाट सुरु भएको कार्यक्रम सांस्कृतिक तथा साहित्यिक प्रस्तुतिले भरिपूर्ण बनेको थियो। कार्यक्रममा कविता वाचन, गीत प्रस्तुति र सुसेली बाचनले उपस्थित दर्शक तथा अतिथिहरूलाई मनोरञ्जन प्रदान गरेको थियो।

प्रमुख अतिथि इन्दिरा रानामगरले जनआकाश मिडियाले विगत दुई दशकदेखि पत्रकारिता र समाजसेवाको क्षेत्रमा पुर्‍याएको योगदान प्रशंसनीय रहेको बताउँदै आगामी दिनमा अझ प्रभावकारी ढंगले अघि बढ्न शुभकामना व्यक्त गरिन्।

विशेष अतिथि शान्तराम विडारीले स्वतन्त्र, जिम्मेवार र जनउत्तरदायी पत्रकारिताको आवश्यकता औंल्याउँदै जनआकाशले समाजका विविध पक्षलाई उजागर गर्न निरन्तर भूमिका खेल्ने विश्वास व्यक्त गरे।

कार्यक्रममा सहभागी अन्य अतिथिहरूले पनि कविता, गीत र शुभकामना मन्तव्यमार्फत जनआकाश मिडियाको उज्ज्वल भविष्यको कामना गरेका थिए।

चर्चित कलाकारहरूको प्रस्तुति

वार्षिकोत्सव समारोहमा चर्चित गायक गोविन्द मधुर, विष्णु परियार लगायतका कलाकारहरूले सांगीतिक प्रस्तुति दिएका थिए। उनीहरूको प्रस्तुति कार्यक्रममा आकर्षणको केन्द्र बनेको थियो।

यस्तै, दिपेश एसके र प्रतिमा राईले स्वदेशगानमा स्वागत नृत्य प्रस्तुत गर्दै कार्यक्रमलाई थप आकर्षक बनाएका थिए। उनीहरूको देशभक्तिपूर्ण नृत्यले उपस्थित दर्शकको मन जितेको थियो।

कलाकार र स्रष्टाहरूलाई कदरपत्रसहित सम्मान

कार्यक्रममा विभिन्न क्षेत्रमा योगदान पुर्‍याएका व्यक्तित्वहरूलाई सम्मान गरिएको थियो।

विशेषगरी ‘संगीत खबर’ कार्यक्रममा सहभागी कलाकारहरू तथा जनआकाशका पत्रकार विनोद कार्कीद्वारा लिखित ‘फूल भिरैमा’ लोक–आधुनिक गीतमा स्वर दिने गायक–गायिका, नृत्यकार तथा संगीतकारलाई कदरपत्र प्रदान गरी सम्मान गरिएको थियो।

यसैगरी, कार्यक्रमको विशेष अवसरमा जनआकाश मिडियाका आजीवन सदस्यहरूलाई प्रमुख अतिथि इन्दिरा रानामगरको हातबाट आजीवन सदस्यताको प्रमाणपत्र प्रदान गरिएको थियो। प्रमाणपत्र वितरणमार्फत संस्थाप्रति उनीहरूको दीर्घकालीन प्रतिबद्धता र योगदानको सम्मान गरिएको आयोजकले जनाएको छ।

यस सम्मानले नेपाली कला, संगीत र सिर्जनात्मक क्षेत्रसँगै संस्थागत योगदानलाई पनि प्रोत्साहन पुगेको आयोजकको विश्वास रहेको छ।

अनुपस्थित व्यक्तित्वको सन्देशले छोयो मन

स्वास्थ्य र उमेरका कारण कार्यक्रममा उपस्थित हुन नसके पनि पूर्व उपरथी तेजप्रकाश बाँनियाँ र वरिष्ठ समाजसेवी भद्रकुमारी घलेले शुभकामना सन्देश पठाएका थिए।

उनीहरूले मोहन कार्की नेतृत्वको टोलीलाई आशीर्वादसहित कविता र सुसेलीमार्फत शुभकामना व्यक्त गरेका थिए। ती कविता र सुसेली कार्यक्रममै वाचन गरिँदा सहभागीहरूले भावुक बनेर ताली बजाएका थिए।

सबै सहभागीलाई मायाको चिनो

कार्यक्रमको अन्त्यमा सभापति मोहन कार्की र प्रमुख अतिथि इन्दिरा रानामगरको हातबाट कार्यक्रममा उपस्थित सबै अतिथि तथा सहभागीलाई मायाको चिनो प्रदान गरिएको थियो।

आयोजकका अनुसार कार्यक्रम केवल वार्षिकोत्सवको औपचारिक समारोह मात्र नभई पत्रकारिता, साहित्य, संगीत र सामाजिक क्षेत्रबीचको सहकार्य तथा सम्मानको साझा उत्सवका रूपमा सम्पन्न भएको हो।

सामाजिक उत्तरदायित्वमा एक दशकदेखि सक्रिय

जनआकाश साप्ताहिकले विगत १० वर्षदेखि सामाजिक उत्तरदायित्व अन्तर्गत विभिन्न जनहितका कार्यक्रम सञ्चालन गर्दै आएको जनाएको छ।

यस संस्थाका सञ्चालक मोहन कार्की पत्रकार मात्र नभई गीतकार, साहित्यकार र लेखकका रूपमा पनि परिचित छन्। उनले लेखेको ‘माइली’ उपन्यास, ‘कृपज विकासवादी’ कृति, ‘आउन साथी आऊ सबै मिली विजयीको मिठो गीत गाऊँ’ तथा ‘मलाई सुन्दर नेपाल बनाउने रहर छ’ बोलको स्वदेशगान सार्वजनिक गरिसकेका छन्।

उनको साहित्यिक तथा सांगीतिक यात्राले पत्रकारितासँगै सिर्जनशीलताको अर्को आयाम पनि स्थापित गरेको सहभागीहरूको भनाइ थियो।

यसै अवसरमा जनआकाश मिडियाका आजीवन सदस्यहरूलाई प्रमुख अतिथि निवर्तमान उपसभामुख तथा प्रतिनिधिसभा सदस्य इन्दिरा रानामगरको हातबाट आजीवन सदस्यताको प्रमाणपत्र प्रदान गरिएको थियो। यसले संस्थाप्रति उनीहरूको दीर्घकालीन योगदान र प्रतिबद्धताको सम्मान गरिएको आयोजकले जनाएको छ।

आगामी यात्राप्रति प्रतिबद्धता

वार्षिकोत्सव समारोहमा वक्ताहरूले जनआकाश मिडियाले १९ वर्षको यात्रामा पत्रकारिता, कला, साहित्य र सामाजिक चेतनाको क्षेत्रमा पुर्‍याएको योगदान उल्लेखनीय रहेको बताउँदै आगामी दिनमा पनि सत्य, निष्पक्ष र जनपक्षीय पत्रकारितालाई अझ सशक्त रूपमा अघि बढाउने विश्वास व्यक्त गरेका थिए।

कार्यक्रम उत्साहपूर्ण वातावरणमा सम्पन्न भएको आयोजकले जनाएको छ।