अदालत परिसरबाट फरार वीरगञ्जका मेयर सिंह प्रहरीकाे नियन्त्रणमा

काठमाडाैं । वीरगञ्ज महानगरपालिकाका मेयर राजेशमान सिंह पक्राउ परेका छन्।

पर्सा प्रहरीले जिल्ला अदालत पर्साबाट पक्राउ पुर्जी जारी भएको ८ दिन पछि मेयर सिंहलाई पक्राउ गरेको हो। पर्साको ठोरी एरियामा लुकीछिपी बस्दै गरेको अवस्थामा विशेष सूचनाको आधारमा गरिएको अप्रेशनबाट मेयर सिंहलाई पक्राउ गरिएको जिल्ला प्रहरी कार्यालय पर्साले जनाएकाे छ ।

पक्राउ पुर्जी जारी भएपछि मेयर सिंह एकदिन अदालत पुगेर त्यसपछि फरार भएका थिए । प्रहरीकाे विशेष टोलीले उनलाई नियन्त्रणमा लिएको हो। यहि जेठ १२ गते जिल्ला अदालत पर्साले लिखत सम्बन्धी कसुरमा पक्राउ गर्न मेयर सिंहविरूद्ध पक्राउ पुर्जी जारी गरेको थियो।

स्थानीय लियाकत अलीको जाहेरी बमोजिम जिल्ला अदालत पर्साले मेयर सिंहसहित तीन जनाविरुद्ध पक्राउ पुर्जी जारी गरेको छ। पक्राउ परेका मेयर सिंहलाई जिल्ला प्रहरी कार्यालय पर्साको हिरासतमा राखिएको हाे।