सरकारले सुकुम्बासी बस्तीमा बर्बरतापूर्वक हमला गर्‍यो, अब काँग्रेसले प्रतिवाद गर्छः गगन थापा

काठमाडौं । प्रमुख प्रतिपक्ष दल नेपाली काँग्रेसका सभापति गगनकुमार थापाले सरकारले सुकुम्बासी बस्तीमाथि बर्बरतापूर्वक हमला गरेको भन्दै त्यसको प्रतिवादमा उत्रिन पार्टीका नेता, कार्यकर्तालाई निर्देशन दिएका छन् ।

शुक्रवार सानेपास्थित पार्टी मुख्यालयमा आयोजित ‘नेपालमा भूमिहिन सुकुम्वासी र अव्यवस्थित बसोवासीको अवस्थाः डोजर आतंक र सुकुम्वासी पीडा’ विषयक कार्यक्रममा बोल्दै उनले सो निर्देशन दिएका हुन् ।

सभापति थापाले पार्टीका संघीय तथा प्रदेश तथा स्थानीय सरकारमा रहेकाहरुलाई सरकारको सो बर्बरताको विरुद्ध प्रतिवाद गर्न सचेत गराए । ‘अहिले सत्तामा बसिरहनुभएका साथीहरुको जुन क्रुरता छ नि । जुन बर्बरता छ । यो क्रुरता र बर्बरता पछाडि पनि कम्फटेवल फिल गर्ने कुरा मैले चाँही विगतमा देखेको छैन । यो खालको क्रुरता, बर्बरता मैले अहिलेसम्म देखेको छैन । स्टेट चलाउँदाखेरी मैले जति क्रुर भएपनि हुन्छ, बर्वर भएपनि हुन्छ भन्ने कुरा चाँही राज्य चलाउँदै गर्दा मसँग करुणा हुनुपर्छ’ उनले भने ।

उनले सरकारले सुकु्म्बासी बस्तीमा बर्बरता देखाएर पनि कम्फरटेबल फिल गरिरहेको भन्दै यस्तो शासक आफूले यसअघि नदेखेको दाबी समेत गरे । सभापति थापाले सरकारले बल प्रयोग गर्दा नागरिकलाई पीडालाई समेत बेवास्ता गरेको भन्दै आक्रोश समेत व्यक्त गरे । ‘कानून प्रयोग गर्दाखेरी बल पनि प्रयोग गर्नु पर्छ । तर मैले बल प्रयोग गर्दा मेरो यो अन्तिम हतियार हो । मैले बल प्रयोग गर्दा पनि नागरिकको सबै कुरा हेर्नुपर्छ । यस सन्दर्भमा राज्य सञ्चालन गर्नेहरुको सोचले पनि निर्धारण गर्छ । यो यसको पनि उपज हो । यस विषयमा मेरो केही कुरा छ । एउटा कुरा अहिले नेपाली काँग्रेस संघमा प्रतिपक्षमा छौ । यसलाई चिर्ने काम हाम्रो हो । यसमा तपाईहरुले तथ्य, प्रमाण राखेर पार्लियामेन्टमा बोल्नु पर्छ । म तपाईसँग यो कुराको अपेक्षा गर्दछु’ उनले भने ।

सभापति थापाले सुकुम्बासीको पक्षमा काम गर्नुपर्नेतर्फ केन्द्रित हुन काँग्रेसले नेतृत्व गरिरहेका प्रदेश र स्थानीय सरकारलाई पनि सचेत गराए ।