कास्कीमा वृद्धको शंकास्पद मृत्युः छोरा पक्राउ

काठमाडौं । कास्कीको रूपा गाउँपालिका–४, बागेडाँडामा ६२ वर्षीय रामबहादुर घर्तीको शंकास्पद मृत्यु भएको घटनामा संलग्न रहेको आरोपमा प्रहरीले उनकै छोरालाई पक्राउ गरेको छ ।

प्रहरीले मृतकका ३४ वर्षीय कान्छो छोरा भीमबहादुर भुजेललाई नियन्त्रणमा लिएको हो । गत वैशाख १७ गते साँझ करिव ६ः४५ बजे घर्ती आफ्नै घरमा अचेत अवस्थामा फेला परेका थिए । उनको घाँटीमा गलबन्दी बेरिएको र नाकबाट रगत बगेको देखेपछि स्थानीयले प्रहरीलाई खबर गरेका थिए ।

घटनाको जानकारी पाउनासाथ इलाका प्रहरी कार्यालय शिशुवा र जिल्ला प्रहरी कार्यालय कास्कीबाट खटिएको टोलीले घटनास्थलको प्रारम्भिक अनुसन्धान गरी शवलाई पोस्टमार्टमका लागि पश्चिमाञ्चल क्षेत्रीय अस्पताल पठाएको थियो ।

जिल्ला प्रहरी कार्यालय कास्कीका सूचना अधिकारी हरिबहादुर बस्नेतकाअनुसार घटनास्थलको सुक्ष्म अनुसन्धान गर्दा मृतकको कोठाको ढोका खुला रहेको र घाँटीमा गलबन्दीको फन्का बेरिएको पाइएको थियो ।

अनुसन्धानका क्रममा प्रहरीले वैशाख १८ गते पोखरा महानगरपालिका–११, हस्पिटल चोकबाट मृतकका छोरा भस्मबहादुर भुजेललाई पक्राउ गरेको बस्नेतले बताए ।

पक्राउ परेका भुजेलले प्रहरीसमक्ष दिएको प्रारम्भिक बयानमा हत्याको अनौठो कारण खुलाएका छन् । उनले ‘सपनामा कि बाबुले छोरालाई मार्नुपर्ने, कि छोराले बाबुलाई मार्नुपर्ने’ देखेकाले आफूले बाबुको हत्या गरेको बताएका छन् ।

सूचना अधिकारी बस्नेतकाअनुसार अभियुक्तको मानसिक स्वास्थ्य अवस्थाबारे पनि परीक्षण भइरहेको छ । भुजेलविरुद्ध मुलुकी अपराध संहिता, २०७४ को ज्यान सम्बन्धी कसुर (दफा १७७) अन्तर्गत कर्तव्य ज्यान मुद्दामा जिल्ला अदालतबाट १० दिनको म्याद थप गरी विस्तृत अनुसन्धान अगाडि बढाइएको प्रहरीले जनाएको छ ।