घरभित्र पसेको निहुँमा दलित बच्चामाथि निर्घात कुटपिट, तीन जना पक्राउ

रोल्पा । रोल्पाको गंगादेव गाउँपालिका–५ कुईनेटा घरभित्र पसेको निहुँमा दलित बच्चामाथि निर्घात कुटपिट गर्ने तीन जनालाई प्रहरीले पक्राउ गरेको छ ।

गत शुक्रबार खगेन्द्र विक नाम गरेका ११ वर्षीय बालक स्थानीय भीम बहादुर खत्रीको घरमा पसेको निहुँमा निर्घात कुटपिट भएका हुन् ।

घटनापछि प्रहरीले भीम बहादुर खत्री, मस्त बहादुर खत्री र उनीहरूकै परिवारका अन्य एक सदस्य गरी तीन जनालाई पक्राउ गरेर अनुसन्धान अघि बढाएको जिल्ला प्रशासन कार्यालय रोल्पाका प्रजिअ गंगा बहादुर क्षेत्रीले बताएका छन् ।

उनले भने, ‘घटना वैशाख ११ गतेको हो । भीम बहादुर खत्रीको घरमा पसेको निहुँमा कुटपिट गरिएको भन्ने प्रारम्भिक अनुसन्धानबाट खुलेको छ । प्रहरीले तीन जनालाई पक्राउ गरेको छ । थप अनुसन्धान अघि बढाइएको छ ।’

कुटपिटपश्चात् बालकलाई उपचारका लागि दाङ लगिएको थियो । उनलाई अस्पतालले हिजो (सोमबार) डिस्चार्ज दिएको छ ।